Аб удзеле Пасла Беларусі Анатоля Глаза ў міжнароднай канферэнцыі «Альянс па прадухіленні вялікай вайны»
20.07.2026 г.
18 ліпеня 2026 г. Пасол Беларусі ў Турэцкай Рэспубліцы Анатоль Глаз прыняў удзел у міжнароднай канферэнцыі «Альянс па прадухіленні вялікай вайны» (Alliance to Prevent the Great War), якая праходзіць у Анкары 18–19 ліпеня 2026 г., і выступіў на яе пленарным пасяджэнні.
Даведачна: арганізатарам канферэнцыі выступае Даследчы цэнтр Ініцыятывы глабальных цывілізацый DÜNYA-MER. У мерапрыемстве прымаюць удзел дыпламаты, дзеючыя і былыя парламентарыі, вайскоўцы ў адстаўцы, навукоўцы і прадстаўнікі экспертнай супольнасці Турцыі і шэрагу замежных дзяржаў, уключаючы Азербайджан, Вялікабрытанію, Германію, Грэцыю, Грузію, Іран, Іспанію, Італію, Расію, ЗША, Францыю, Паўднёва-Афрыканскую Рэспубліку і Японію.
У сваім выступленні А.Глаз выклаў падыходы Рэспублікі Беларусь да недапушчэння маштабнага канфлікту і ўсебаковага садзейнічання зніжэнню ваенна-палітычнай напружанасці ў Еўразіі. Кіраўнік беларускай дыпламатычнай місіі адзначыў, што галоўнай прычынай адсутнасці прагрэсу ў глабальнай дээскалацыі застаецца ігнараванне прынцыпу непадзельнасці бяспекі: бяспека адных дзяржаў не можа забяспечвацца за кошт бяспекі іншых. Палітыка дыктату, незаконных санкцый і аднабаковых абмежаванняў вядзе не да ўмацавання бяспекі, а да паглыблення раздзяляльных ліній, у той час як дзяржавы Еўразіі і Глабальнай большасці валодаюць усім неабходным для самастойнага вырашэння агульных задач.
Асаблівая ўвага экспертаў і ўдзельнікаў мерапрыемства была звернута на тое, што для Беларусі гэтая праблематыка мае непасрэднае практычнае значэнне: баявыя дзеянні вядуцца каля беларускіх межаў, а спробы парушэння паветранай прасторы краіны беспілотнымі лятальнымі апаратамі фіксуюцца практычна штодня. Было адзначана, што беларускі бок рэагуе на правакацыі прафесійна і адказна, не дапускаючы перарастання інцыдэнтаў у міждзяржаўны канфлікт.
У гэтым кантэксце была закранута атака ўкраінскага беспілотнага лятальнага апарата на грамадзянскі аўтобус з юнымі беларускімі спартсменамі ў Бранскай вобласці, якая прывяла да чалавечых ахвяр. Пацверджана патрабаванне Беларусі аб правядзенні поўнага расследавання і прыцягненні вінаватых да адказнасці.
Асаблівая ўвага была нададзена гуманітарнаму ўкладу Беларусі ва ўрэгуляванне канфлікту ва Украіне. Першыя тры раўнды мірных перамоў у 2022 годзе адбыліся на беларускай тэрыторыі, а чацвёрты — у Стамбуле. На тэрыторыі Беларусі і пры непасрэдным садзейнічанні беларускіх ўлад працягваюцца абмены ваеннапалоннымі і перадача цел загінулых; чарговы абмен адбыўся ў чэрвені бягучага года.
Пасол Беларусі запрасіў зацікаўленых партнёраў да шырокага абмеркавання будучай архітэктуры еўразійскай бяспекі на аснове вылучанай Беларуссю і Расіяй Еўразійскай хартыі разнастайнасці і шматпалярнасці ў XXI стагоддзі. Ён канстатаваў, што бяспека не можа будавацца на пагрозах і ультыматумах: без даверу, супрацоўніцтва і справядлівасці любая архітэктура бяспекі застанецца крохкай. Беларусь не імкнецца да канфрантацыі і паслядоўна выступае за адказнасць, стрыманасць і здаровы сэнс у міжнародных адносінах.
Напрыканцы быў пацверджаны настрой беларускага боку на далейшае развіццё беларуска-турэцкіх адносін, заснаваных на ўзаемнай павазе, даверы і сяброўстве, а таксама на сумесную працу з усімі партнёрамі ў інтарэсах міру на агульным кантыненце.
